හඬන පොඩි පුතු

හඬන පොඩි පුතු නළවා ගන්නට නිදන මට රහසින් 
රැයේ තුන්යම නිදිවරා නුඹ නොවිඳිනා දුකකින් 
කහට පොද ගෙන කුරුලු කූජන සමඟ ළඟ ඉඳිමින් 
සිනා පෑවත් කියාලයි තතු විඩාබර මුහුණින් 

ලිහා බත් මුල බුදින මොහොතක මිතුරු කැළ සමඟින් 
වහා දස අත සුවඳ පිරුණා නුඹේ ගුණ සුවඳින් 
කම්හලේ දැති රෝද නැගු රළු පරළු හඬ අතරින් 
නුඹේ හදවත ගැහෙන රාවය මට ඇසේ රහසින් 

අපට අපමය පිහිට පිළිසරණයද යන හැඟුමින් 
සැපත දුක ළඟ සමව සැනසී නිබඳ ඉවසීමෙන් 
මටම දාවුණ පැටවුනට සහ මටද අම්මා වන් 
(සොඳුර නුඹගෙනි එළිය වූයේ උදාවන දිනිදුන්...///)