රූ රැසේ

රූ රැසේ අඳිනා ලෙසේ අත් ලෙළ දිදී විදුලිය පබා
රන් රසේ එක් වන ලෙසේ වෙණ නාද නූ පා තබ තබා
කම් පසේ දෙන සැර ලෙසේ දෙස බල බලා නෙතගින් සබා
මම් කෙසේ පවසමි එසේ වර සුර ළඳුන් දුන් රඟ සොබා

පුන් මදාරා මල් දමින් මුදු දිගු සුනිල් වරළස ගොතා
මන් මදා කිතු ළිය ලෙසින් උර තුර සරා දිලි මුතු ලතා
මන් නදා වන මිණි මෙවුල් නද වෙණ නදින් එක් කොට ඉතා
උන් එදා දුන් රඟ දුටොත් තව සක් සැපක් කවරෙකු පතා

පිපි සමන් කුසුමන් පටින් තන රන් හසුන් මෙන් මන් බැඳී
ළඹ සවන් දිගු රන් පසින් වන නෙත් නුවන් බඳිමින් තදේ
මඳ පවන් වැද ළෙල පහන් සිළු මෙන් රැඟුම් දෙන රන් බඳේ
දිළි ඔවුන් රූ සිරි නුවන් වන් - බඹු වුවත් දැහැණින් මිදේ