ෆර්මිනා

සියක් වසකින් අඩක හුදකලා කාර්තුව
ප්‍රේමයට පවරමී 
වහා ඇවිළී මියෙන හදවතක ස්පන්දනය 
සුසුමකින් නවතමී 
රකිනු බැරි එළිවැටක 
අකුරු ගැන නොසිතමී 
ෆර්මිනා…. නුඹ ප්‍රේමයට කවියකි 
ප්‍රේමයම කවියකි... 

මැග්දලේනා ඉවුරු දිය රළට මුහු වෙන්න 
පිරිමි කඳුලක් බර වැඩී 
කොහේ යනවද නොදැන ඔහේ පාවී ඇදෙන 
මාරුතය මොහොතකට නවතමී 
සියුම් වූ වෙණ තතක 
ජීවය අමුණමී 
ෆර්මිනා නුඹ ප්‍රේමයට කවියකි 
පර්යාය පදයකි... 

පටුනක් තරම් පටු ආදරේ සැකිල්ලක 
පිළිවෙලින් අතරමං වෙමී 
නිමි නොවන කතාවක මම ඉන්නෙ කොතැනකද 
නුඹ ලියූ අකුරකින් නොඅසමී 
ජීවිතය ප්‍රේමයේ එක් කුඩා කොටසකී 
නොදැන උන්නාට නුඹ 
ආලයත් කොලරාවකි 
ප්‍රේමයම කවියකි....